ଆସନ୍ତା ୧୫ରୁ ହାଇକୋର୍ଟରେ ହେବ ଉଭୟ ଭର୍ଚୁଆଲ ଓ ଫିଜିକାଲ ମୋଡରେ ଶୁଣାଣି

କଟକ , (ଓଡିଶା ଟାଇମ୍) :ଆସନ୍ତା ୧୫ ତାରିଖରୁ ଓଡିଶା ହାଇକୋର୍ଟରେ ଉଭୟ ଭର୍ଚୁଆଲ ଓ ଫିଜିକାଲ ମୋଡରେ ହେବ ମାମଲା ଗୁଡ଼ିକର ଶୁଣାଣି । ଏଥିପାଇଁ ହାଇକୋର୍ଟ ରେଜିଷ୍ଟ୍ରି ତରଫରୁ ଏସଓପି ଜାରି କରାଯାଇଛି। ମାମଲାର ଶୁଣାଣି ସମୟରେ ଆଇନଜୀବୀ ଓ ପକ୍ଷମାନେ ବ୍ୟକ୍ତିଗତ ଭାବେ ବା ଭିଡ଼ିଓ କନଫରେନ୍ସିଂରେ ରହିବେ ସେ ନେଇ ବିକଳ୍ପ ଚୟନ ବ୍ୟବସ୍ଥା ରହିବ । ବ୍ୟକ୍ତିଗତ ଉପସ୍ଥିତ ଓ ଭିଡ଼ିଓ କନଫରେନ୍ସିଂରେ ଉଭୟ ବ୍ୟବସ୍ଥାରେ ଏକସଙ୍ଗେ ଶୁଣାଣି ଚାଲିବ। ଯଦି କୌଣସି ମାମଲାରେ ବିକଳ୍ପ ଦିଆଯାଇ ନଥିବ ତେବେ ଆଇନଜୀବୀ ଓ ପକ୍ଷ ଭିଡ଼ିଓ କନଫରେନ୍ସିଂରେ ଉପସ୍ଥିତ ରହିବେ ବୋଲି ଧରାଯିବ।

ସେହିଭଳି ଆସନ୍ତା ୧୫ ତାରିଖରୁ ଫିଜିକାଲ କୋର୍ଟ ମଧ୍ୟ ହେବାକୁ ଥିବାବେଳେ ଏଥିପାଇଁ ସ୍ବତନ୍ତ୍ର ଏସଓପି ଜାରି ହୋଇଛି ।  ଅଦାଲତ ପରିସର ମଧ୍ୟରେ ଜନଗହଳିକୁ ସବୁବେଳେ ବାରଣ କରାଯିବ। କୋର୍ଟ ରୁମ ନିୟମିତ ବିଶୋଧନ କରାଯିବ। କୋର୍ଟ ରୁମରେ ୪ ଜଣରୁ ଉର୍ଦ୍ଧ୍ବ ଓକିଲ ମହକିଲ ଏକତ୍ରିତ ହେବେନାହିଁ। ଆଇନଜୀବୀଙ୍କ କ୍ଲର୍କ ପ୍ରବେଶ ଉପରେ ଲାଗିବ କଟକଣା । କେବଳ ବରିଷ୍ଠ ଓକିଲମାନେ କ୍ଲର୍କମାନଙ୍କୁ ସାଙ୍ଗରେ ନେଇପାରିବ ଲାଗି ଅନୁମତି ପ୍ରଦାନ କରାଯାଇଛି ।  କୋର୍ଟ ରୁମ୍ ମଧ୍ୟରେ କୌଣସି ପ୍ରକାର ସମାଗମକୁ ବାରଣ କରାଯାଇଛି । କେବଳ ମାମଲା ପରିଚାଳନା ପାଇଁ କୋର୍ଟ ରୁମ ପରିସରରେ ପ୍ରବେଶ ଅନୁମତି ରହିଛି ।  ଶୁଣାଣି ସରିବା ପରେ ତୁରନ୍ତ ପ୍ରସ୍ଥାନ ପାଇଁ ଏସଓପିରେ ପରାମର୍ଶ ଦିଆଯାଇଛି ।