ଅନାସ୍ଥା ବନାମ ମୂଷାମାରୀ…
BHUBANESWAR: () କୁହାଯାଏ କାଳେ, ଜାହାଜ ବୁଡ଼ିବା ପୂର୍ବରୁ ମୂଷାମାନେ, ଅନ୍ୟ ଜାହାଜକୁ ଡେଇଁ ଯାଇଥାନ୍ତି । କିନ୍ତୁ ଏଠି ବୁଝି ମଧ୍ୟ ଅବୁଝା ରହି ଯାଉଛି, କେଉଁ ଜାହାଜ ବୁଡ଼ିବାକୁ ଯାଉଛି, ବା କହିବାକୁ ଗଲେ ଅଧାରୁ ଅଧିକ ବୁଡ଼ି ଗଲାଣି ! ସେସବୁ ଜାହାଜର ମୂଷା ଯିବେ କୁଆଡ଼େ ! ସେମାନେ ଅନ୍ୟ ଜାହାଜକୁ ଡେଇଁ ପାରିବେ ତ ! ନାଁ ସେହି ମୌକା ଦେଖି ରାଜ୍ୟ କଂଗ୍ରେସ ସଭାପତି ଭକ୍ତ ଚରଣ ଦାସ, ଓଡ଼ିଶା ରାଜନୈତିକ ମାର୍କେଟରେ ମୂଷାମାରୀ ଔଷଧର Launching Ceremoney କରାଇ ଦେଇଛନ୍ତି !
- () ସେଦିନ ଥାଏ, 21 ଜୁଲାଇ ସୋମବାର । ଦିନ ତମାମ ସୁରୁଖୁରୁରେ ସବୁ କାମ ସୁଚାରୁ ରୂପେ ସାରିବା ପରେ ସନ୍ଧ୍ୟାରେ ଉପରାଷ୍ଟ୍ରପତି ପଦରୁ ଇସ୍ତଫା ଦେଲେ ଜଗଦୀପ ଧନଖଡ଼ । ଆଉ ସେହି ଦିନ ମଧ୍ୟ ମହିଳା ନିର୍ଯାତନାକୁ ପ୍ରସଙ୍ଗ କରି ଓଡ଼ିଶାର ବିଜେପି ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିବାକୁ, ରାଜ୍ୟର ପ୍ରମୁଖ ବିରୋଧୀ ରାଜନୈତିକ ଦଳ ବିଜେଡିକୁ ଆହ୍ବାନ ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ ।…
- () ସୋମବାର ରାଜ୍ୟ ରାଜନୀତିରେ ହୋଇଥିବା ଏଭଳି ଡେଭଲପମେଣ୍ଟକୁ ନେଇ ଅନ୍ତର୍ଯାମୀ ବାବୁ ବେଶ ବ୍ୟଗ୍ର ହୋଇ ପଡ଼ିଥିଲେ । ଗାଁରେ ରହିଲେ ମଧ୍ୟ ରାଜନୀତି ପ୍ରତି ଖାସ ରୁଚି ରଖୁଥିବା ଅନ୍ତର୍ଯାମୀ ବାବୁଙ୍କ ମୁଣ୍ଡରେ ରାଜ୍ୟର ବିଜେପି ସରକାର ବିରୋଧରେ, ଭକ୍ତବାବୁଙ୍କ ବିଜେଡି ପ୍ରତି ଆହ୍ବାନ, ଘାଣ୍ଟି ହେଉଥାଏ । ଦୁଇ ଦିନଧରି ଯେତେ Brain Storming Exercise କଲେ ମଧ୍ୟ, ଅନ୍ତର୍ଯାମୀ ବାବୁ, ଭକ୍ତ ଦାସଙ୍କ ଅନାସ୍ଥା ପ୍ରସ୍ତାବ ଆହ୍ବାନ ଏବଂ ଚ୍ୟାଲେଞ୍ଜର ଟେର୍ ପାଉ ନଥିଲେ । କିନ୍ତୁ ବୁଧବାର ସେ ହାଟକୁ ଯାଇଥିଲେ । ହାଟରେ ପଶୁ ପଶୁ ହଠାତ ଜଣେ ବୁଲା ବେପାରୀଙ୍କ ଉପରେ ତାଙ୍କ ନଜର ପଡ଼ିଲା । ବେପାରୀ ଜଣକ ହାଟରେ ବୁଲି ବୁଲି ମୂଷାମରା ଔଷଧ ବିକୁଥିଲେ । ଅନ୍ତର୍ଯାମୀ ବାବୁ ହାଟରୁ ସଉଦା କିଣିବା ପଛକୁ ରଖି, ସେହି ଲୋକ ପଛେ ପଛେ ଚାଲିଲେ । ବେପାରୀ ଜଣକ ଗଳା ଫଟାଇ ଗରାଖଙ୍କୁ ଡାକୁଥିଲେ । … ‘ମୂଷାମାରୀ ନିଅ, ମୂଷାମାରୀ… ମୂଷା ଖାଇଲେ ମଲା, ଶୁଂଘିଲେ ମଲା, ଦେଖିଲେ ମଲା’… ଏମିତି ଡାକ ପକାଉଥିଲ ବେପାରୀ ଜଣକ । ଅନ୍ତର୍ଯାମୀ ବାବୁ, ସେହି ବେପାରୀଙ୍କ ଏଭଳି ଡାକ ଶୁଣୁଥିଲେ । ମୂଷାମାରୀ ଔଷଧକୁ ମୂଷା ଖାଇଲେ ମରିବ କଥାକୁ ସେ ସଙ୍ଗେ ସଙ୍ଗେ ବିଶ୍ବାସ କରିନେଲେ । କିନ୍ତୁ ଶୁଂଘିଲେ କିମ୍ବା ଦେଖିଲେ ମରିବା ଦାବିକୁ ସେ ଗ୍ରହଣ କରିପାରିଲେ ନାହିଁ । ସଂପୃକ୍ତ ମୂଷାମରା ଔଷଧ ବେପାରୀରଙ୍କ ଶେଷ 2 ଦାବି, ଅନ୍ତର୍ଯାମୀ ବାବୁଙ୍କ ମନରେ ଦ୍ବନ୍ଦ୍ବ ସୃଷ୍ଟି କଲା । ସେ ସଂକ୍ରାନ୍ତ ଚିନ୍ତାକୁ ପଛକୁ ରଖିଦେଇ ଅନ୍ତର୍ଯାମୀ ବାବୁ ହାଟରୁ ପନିପରିବା କିଣିଲେ । ଆଉ ଘରକୁ ଫେରିଲେ ।…
- () ଘରକୁ ଫେରିବା ବେଳେ ଛକରେ ତାଙ୍କୁ ହଠାତ ଦେଖି ନିଅନ୍ତି ଲଳିତ ବାବୁ । ଲଳିତ ବାବୁ ଗାଁରେ ବ୍ୟବସାୟ କରନ୍ତି, କିନ୍ତୁ ରାଜନୀତି ପ୍ରତି ତାଙ୍କର ଏକ Extra ରୁଚି ରହିଛି । ସେ ଗାଁ ରାଜନୀତି ହେଉ ବା ରାଜ୍ୟ କିମ୍ବା ଜାତୀୟ କିମ୍ବା ଅନ୍ତର୍ଜାତୀୟ । ଅନ୍ତର୍ଯାମୀ ବାବୁଙ୍କ ସହ ଲଳିତ ବାବୁଙ୍କ ରାଜନୈତିକ ଚର୍ଚ୍ଚା ସ୍ବତନ୍ତ୍ର । ଆଉ ସେଦିନ ଅନ୍ତର୍ଯାମୀ ବାବୁଙ୍କୁ ଦେଖିବା ମାତ୍ରେ, ପିସିସି ସଭାପତି ଭକ୍ତ ଦାସ, ବିଜେପି ସରକାର ବିରୋଧରେ ଦେଇଥିବା ଅନାସ୍ଥା ପ୍ରସ୍ତାବ ଚ୍ୟାଲେଞ୍ଜକୁ ନେଇ ଆଲୋଚନା ଆରମ୍ଭ କରିଦେଲେ । ଭକ୍ତଙ୍କ ମୁହଁରୁ ବାହାରିଥିବା ଅନାସ୍ଥା ପ୍ରସ୍ତାବ ବାବଦରେ ଲଳିତ ବାବୁ ପଚାରୁ ପଚାରୁ, ଅନ୍ତର୍ଯାମୀ ବାବୁ, ସେହି ମୂଷାମାରୀ ଔଷଧ ବିକୁଥିବା ବେପାରୀଙ୍କ କଥା କହିଲେ । ଶୁଣୁ ଶୁଣୁ ଲଳିତ ବାବୁ ଏମିତି ହସିଲେ ଯେ, ହସି ହସି ଘରକୁ ପଳାଇଲେ ।…
- () ହଁ, ଆଜ୍ଞା… ଏଇଠି ଆପଣମାନେ ବି ହସୁଥିବେ । କାରଣ ଆପଣ ଭାବୁଥିବେ, ଭକ୍ତଙ୍କ ଅନାସ୍ଥା ପ୍ରସ୍ତାବ ଆହ୍ବାନ ସହ ମୂଷାମାରୀ ଔଷଧର କଣ ସମ୍ପର୍କ ରହିଛି ! ସମ୍ପର୍କ ରହିଛି ଆଜ୍ଞା, ଏହି ମୂଷାମାରୀ ଔଷଧ ଯାହା, ପିସିସି ସଭାପତି ଭକ୍ତ ଦାସଙ୍କ ଅନାସ୍ଥା ପ୍ରସ୍ତାବ ଚ୍ୟାଲେଞ୍ଜ ଓ ଆହ୍ବାନ କହିବାକୁ ଗଲେ ତାହା । କାରଣ ଏହି ଅନାସ୍ଥା ରୂପୀ ମୂଷାମାରୀ ଔଷଧକୁ ଖାଇବାକୁ ଯାଇ ଯଦି ବିଜେଡି ଗିଳିଦିଏ, ଆଉ ଯଦି ଏହା ହଜମ ନହୁଏ, ତେବେ ପେଟରୁ ଏହାକୁ ଗାଳିବା ବହୁତ କଷ୍ଟକର ହୋଇପାରେ ! ବିଜେଡିର କିଛି ବି ହୋଇଯାଇ ପାରେ । ଆଉ ଯଦି, ନଖାଇ ଖାଲି ଶଂଘିବାକୁ ଚେଷ୍ଟା କରେ, ତେବେ ତାହା ମଧ୍ୟ ଦଳ ପାଇଁ ବଡ଼ ବିପଦ ସୃଷ୍ଟି କରିପାରେ ! …
- () ଭକ୍ତଙ୍କ ଅନାସ୍ଥା ପ୍ରସ୍ତାବ ଚ୍ୟାଲେଞ୍ଜ ଓ ଆହ୍ବାନ ଉପରେ, ଗତକାଲି ଆମେ, ଏହି ପୋର୍ଟାଲରେ ‘ଗୁଳି ନା ଗୁଗଲୀ’ ଶୀର୍ଷକ ଆଲେଖ୍ୟରେ ବିଜେଡିର ରାଜନୈତିକ ସତୀତ୍ବ ଅବତାରଣା କରିସାରିଛୁ । ତେଣୁ ପଛକୁ ଫେରିବା ଅନାବଶ୍ୟକ ହୋଇଥିବା ବେଳେ ଏବେ ଆସନ୍ତୁ ଯିବା ମୂଷାମାରୀ ଔଷଧ ପ୍ରସଙ୍ଗକୁ ।…
- () କହିବାକୁ ଗଲେ, ବିଜେଡିକୁ ବିଜେପି ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିବାକୁ ପିସିସି ସଭାପତି ଭକ୍ତ ଦାସ ଦେଇଥିବା ଅନାସ୍ଥା ଆହ୍ବାନ ହିଁ ବିଜେଡି ପାଇଁ ମୂଷାମାରୀ । କାରଣ ଅତୀତରେ ବିଜେଡି କ୍ଷମତାରେ ଥିବା ବେଳେ, ରାଜ୍ୟରେ ସିନା ବିଜେପି ବିରୋଧରେ ଫଁ ଫଁ ହୋଇଛି, କିନ୍ତୁ କେନ୍ଦ୍ରର ବିଜେପି ନେତୃତ୍ବାଧୀନ ସରକାର ଆଗରେ କୁଁ କୁଁ ହୋଇ ଲାଞ୍ଜଯାକି ବସିଛି । ତେଣୁ ଦେଖିବାକୁ ଗଲେ, କ୍ଷମତାରେ ଥିବା ବେଳେ ଯଦି, ବିଜେଡି, ବିଜେପିକୁ ଚ୍ୟାଲେଞ୍ଜ କରିପାରିନି, ଏବେ ଆଦୌ କ୍ଷମତା ନଥାଇ, କେମିତି ଅନାସ୍ଥା ପ୍ରସ୍ତାବ ଆଣି ଚ୍ୟାଲେଞ୍ଜ କରିବ ! ଲୋକସଭାରେ ବିଜେଡିର ଜଣେ ବି ସଦସ୍ୟ ନଥିବା ବେଳେ ଓଡ଼ିଶା ପାଇଛି ଡବଲ୍ ଇଞ୍ଜିନ ସରକାର । ଯାହାର ଆଗ ଇଞ୍ଜିନ ହେଉଛନ୍ତି କେନ୍ଦ୍ର ସରକାର । ତେଣୁ ପୂର୍ବରୁ ଯଦି କେନ୍ଦ୍ରର ବିଜେପି ନେତୃତ୍ବାଧୀନ ସରକାରକୁ ଆଖିରେ ଆଖି ମିଶାଇ ବିଜେଡି ଚାହିଁ ପାରିନି, ଏବେ କେମିତି ଚାହିଁବ ! ରାଜ୍ୟରେ ମୋହନ ମାଝୀ ନେତୃତ୍ବାଧୀନ ବିଜେପି ସରକାରକୁ ନାଲି ଆଖି ଦେଖାଇବା କଣ, କେନ୍ଦ୍ର ସରକାରଙ୍କୁ ନାଲି ଆଖି ଦେଖାଇବା ନୁହେଁ ! ବିଜେଡି ପାଇଁ ଇଡି, ସିବିଆଇର ଛାଟ ଏବେ ଅଛି ନା ନାହିଁ ! ନା ପ୍ରଚ୍ଛଦ ପଟରେ ଛାଇ ହୋଇ ଏବେ ବି ରହିଛି ! କେତେବେଳେ ବି ବ୍ୟବହାର ହୋଇପାରେ ! କାରଣ କଳା ଗୋଲାପ ଫୁଟୁ ନଥିଲେ ମଧ୍ୟ ଗଛଟି ଜୀଁଇଥିବା ଭଳି, ଅନେକ ପ୍ରସଙ୍ଗ ଏବେ ବି ଉଜ୍ଜୀବିତ ରହିଛି । ତେଣୁ ଏ ଦୃଷ୍ଟିରୁ ଦେଖିବାକୁ ଗଲେ, ବିଜେଡି ହୁଏତ, ଅନାସ୍ଥା ରୂପୀ ମୂଷାମାରୀକୁ ଖାଇ ନପାରେ ! ପୁଣି ଗିଳିଦେଲା ପରେ ଯଦି ହଜମ ନହେବ !
- () ଭକ୍ତଙ୍କ ଏହି ଅନାସ୍ଥା ରୂପୀ ମୂଷାମାରୀକୁ ଶୁଂଘିବାକୁ ମଧ୍ୟ ବିଜେଡିର ସାହସ ନାହିଁ । କାରଣ, ଶୁଂଘୁ ଶୁଂଘୁ ଯଦି, 51ଟା 15 ହୋଇଯିବ, ତେବେ କଥା ସରିଯିବ…
- () ସେପଟେ ଯେତେ ନିଶ୍ଚିତ ହେଲେ ମଧ୍ୟ ରାଜ୍ୟର ବିଜେପି ସରକାରର ନିଜ ଛାଇ ପ୍ରତି ଟିକେ ଭୟ ରହୁଛି । କାରଣ ରାଜ୍ୟରେ ବିଜେପି, ଏକକ ସଂଖ୍ୟା ଗରିଷ୍ଠତାରେ ସରକାର ଗଢ଼ିଥିଲେ ମଧ୍ୟ, ଗୋଷ୍ଠୀ କନ୍ଦଳ ଛାଇ ହୋଇ, ଛାନିଆ କରାଉଛି ।...
- () ରାଜ୍ୟ ବିଧାନସଭାର ଚଳିତବର୍ଷର ମୌସୁମୀ ଅଧିବେଶନ ଏଯାଏଁ ଆରମ୍ଭ ହୋଇନି । ପୂର୍ବର ସବୁ ବର୍ଷଠାରୁ ଏହା ଅହେତୁକ ବିଳମ୍ବ ହେଲାଣି । କଣ ହୋଇପାରେ ଏହାର କାରଣ ! ପୁଣି ମନ୍ତ୍ରିମଣ୍ଡଳ ସଂପ୍ରସାରଣ କଥା ବର୍ତ୍ତମାନ ପାଇଁ Holdରେ ରହିଲା ବୋଲି ଶୁଣିବାକୁ ମିଳିଲାଣି । ଏସବୁ କାହିଁକି ହେଉଛି, କେମିତି ହେଉଛି ? ସେ ବାବଦରେ ବୋଧହୁଏ, ଗହୀରିଆ ଚିନ୍ତନର ଆବଶ୍ୟକତା ରହିଛି । ତଥାପି ମନ୍ତ୍ରୀ ସୁରେଶ ପୂଜାରୀ, ବିରୋଧୀଙ୍କୁ ଭଲ ରକମ ପଦେ ଶୁଣାଇ ଦେଇଛନ୍ତି । ସରକାର ବିରୋଧରେ ଅନାସ୍ଥା ପ୍ରସ୍ତାବ ଆଣିଲେ, ବିରୋଧୀ କ୍ଷତାକ୍ତ ହେବା ଥୟ ବୋଲି ଶୁଣାଇ ଦେଇଛନ୍ତି ସେ ।…
- () 51କୁ 51 ବିଧାୟକଙ୍କୁ ବାନ୍ଧି ରଖିବା ନେଇ ବିଜେଡି ସନ୍ଦୀହାନରେ ଥିବା ବେଳେ, ନିଜର 78 ଏବଂ 3 ସ୍ବାଧୀନ ବିଧାୟକଙ୍କ ସମର୍ଥନ ଥାଇ ମଧ୍ୟ ଅନେକ ମାତ୍ରାରେ ଟେନସନରେ ରାଜ୍ୟର ବିଜେପି ସରକାର । ସରକାରରେ ଥାଇ ତଥା ଶାସକ ଦଳର ବିଧାୟକ ଥିବା, ଆର ସାହିର ଅତିକମରେ 10 ଟୋକା ଖେଳ କରି ଦେବେନି ତ !!!