ଜାନୁଆରି ୧୦ ସୁଦ୍ଧା ଅଯୋଧ୍ୟା ଶୁଣାଣି ଲାଗି ଗଠନ ହେବ ସୁପ୍ରିମକୋର୍ଟର ନୂଆ ଖଣ୍ଡପୀଠ
ଭୁବନେଶ୍ୱର,(ଓଟି): ଅଯୋଧ୍ୟାର ବାବ୍ରି ମସ୍ଜିଦ୍- ରାମ ଜନ୍ମଭୂମି ଟାଇଟଲ୍ ସୁଟ୍ ଉପରେ ଶୁଣାଣି ନିମନ୍ତେ ଜାନୁଆରି ୧୦ ତାରିଖ ପୂର୍ବରୁ ନୂଆ ଖଣ୍ଡପୀଠ ଗଠନ ହେବା କଥା ଶୁକ୍ରବାର ଦିନ ସୁପ୍ରିମକୋର୍ଟ କହିଛନ୍ତି। ପ୍ରଧାନ ବିଚାରପତି ଜଷ୍ଟିସ୍ ରଞ୍ଜନ ଗୋଗୋଇ କହିଛନ୍ତି, ନୂତନ ଖଣ୍ଡପୀଠ ଶୁଣାଣି ଉପରେ ସମୁଚ୍ଚିତ ଆଦେଶ ଜାରି କରି ପାରିବେ।
ଆହ୍ଲାବାଦ ହାଇକୋର୍ଟଙ୍କ ୨୦୧୦ ରାୟ ବିରୋଧରେ ଆଗତ ଡଜନାଧିକ ପିଟିସନ୍ ଉପରେ ସୁପ୍ରିମକୋର୍ଟ ଶୁଣାଣି କରୁଥିଲେ। ଅଯୋଧ୍ୟାସ୍ଥିତ ୨. ୭୭ ଏକର ବିଶିଷ୍ଟ ବିବାଦୀୟ ଜମିକୁ ଦିଅଁ ରାମ ଲାଲ୍ଲା, ନିର୍ମୋହି ଆଖଡ଼ା ଏବଂ ସୁନ୍ନି ଓ୍ଵାକଫ୍ ବୋର୍ଡ- ଏହି ତିନି ପକ୍ଷ ମଧ୍ୟରେ ବାଣ୍ଟି ଦେବାକୁ ରାୟ ଦେଇଥିଲେ।
୨୦୧୦ ମସିହାରୁ ମାମଲା ସୁପ୍ରିମକୋର୍ଟରେ ପଡ଼ି ରହିଥିଲା। ଶୁଣାଣି ସମୟରେ ବିଚାର ପାଇଁ ଅନ୍ୟ କେତୋଟି ପ୍ରସଙ୍ଗ ମଧ୍ୟ ଉଠିଥିଲା। ସେଥିରୁ ଗୋଟାଏ ପ୍ରସଙ୍ଗ ହେଉଛି, ମସ୍ଜିଦ କ’ଣ ଇସ୍ଲାମ୍ର ଅବିଚ୍ଛେଦ୍ୟ ଅଙ୍ଗ।
ଆଜିର ଶୁଣାଣି ପୂର୍ବାହ୍ନ ୧୦: ୩୦ ମିନିଟ୍ ସମୟରେ ଭାରତର ପ୍ରଧାନ ବିଚାରପତି ଜଷ୍ଟିସ୍ ରଞ୍ଜନ ଗୋଗୋଇ ଏବଂ ଜଷ୍ଟିସ୍ ଏସକେ କୌଲ୍ଙ୍କ ଖଣ୍ଡପୀଠକୁ ଆସିଥିଲା। ୬୦ ସେକେଣ୍ଡ ଧରି ଚାଲିଥିବା ଆଜିର ଶୁଣାଣି ଉଭୟ ପକ୍ଷରୁ କୌଣସି ଯୁକ୍ତି ଉପସ୍ଥାପନ କରାଯାଇ ନ ଥିଲା।
ବହୁ ସାମ୍ବାଦିକ ଏବଂ ଓକିଲ କୋର୍ଟରୁମ୍ ନମ୍ବର-୧ରେ ଏହି ଶୁଣାଣି ପାଇଁ ଅପେକ୍ଷା କରି ରହିଥିଲେ। ଏପରିକି ସମଗ୍ର ଦେଶରେ ଏହାକୁ ନେଇ ଉତ୍ସୁକତା ଲାଗି ରହିଥିଲା। କିନ୍ତୁ ମାତ୍ର ୧୫ ସେକେଣ୍ଡରେ ଆଜିର ଶୁଣାଣି ସାରିଦେଇଛନ୍ତି ସୁପ୍ରିମ୍କୋର୍ଟ।